SUN世代：最愛熱廚房

在田徑場上競賽，若不想輸，就要跑得比人快。關偉聰的人生跑得比人快，年僅二十八歲已攀升至高級餐廳的副行政總廚，在職場上三級跳。然而，火爆的性格，為他帶來負累，曾因升職太快遭受冷嘲熱諷，又曾因胡亂向同事開火而遭離棄。風光背後，他被刺得一身傷，但他從不服輸，整裝待發再起步，向着目標邁進。

「我媽咪成日話我點解唔讀書，仲經常將我同成績好叻嘅表哥表弟比較！」自幼不愛讀書，關偉聰只愛在廚房搞搞震，不時走入廚房陪媽咪煮飯，問「呢樣係乜，嗰樣係乜」。由於鍾情於煮食，他曾想過中三畢業便跑入這個大火爐，但遭家人勸阻，完成中五會考後，他即投考職業訓練局的西廚課程，為廚師夢踏出第一步。

完成課程後，首份工作就是到君悅酒店的西餐廳當學徒，三個月的地獄式實習期，他做過餅房、咖啡廳及扒房等，每個地方都有難忘經歷，每日都在怒罵聲中度過，「切菜慢啲會鬧，做錯步驟又會鬧」。

不想捱罵，就要小心記低每個步驟，並重複練習，就算搓足十個鐘頭麵粉，也毫無怨言，刻苦耐勞，慢慢練得一門手藝：「最叻做Hand Made Pasta，手搓粉糰做Pasta係我嘅專長。」正因這項專長，他得到現職高級餐廳的行政總廚Nelson注意，獲邀試工，「有同事知我整得一手好意粉，介紹我畀Nelson，試工嗰日我都有蝦碌，做得唔好，但Nelson覺得我OK就請咗我。」

原以為可以跳出地獄，結果是跳入另一個地獄；Nelson給了關偉聰很多大考驗，但不是煮食的考驗，而是人事的考驗：「做咗半年已經升職，當時我覺得好快，擔心做唔嚟想唔升，但Nelson覺得我可以。」受到賞識，他兩年後再升任二廚，職位三級跳，直升機般升職，卻遭同事眼紅，嘲諷他靠擦鞋上位，說他太年輕未夠資格管人。

儘管冷言冷語不斷，他未有氣餒，反而加倍努力，要求做到更好，努力終獲回報，漸漸他獲得肯定，去年再跳一級升任餐廳副行政總廚。對自己要求高，對別人要求也高，但火爆性格卻成為仕途上的一個觸礁點。

不少廚師對食物都很執着，要求依足步驟。同樣，每當下屬做得不好，他就會責罵，甚至爆粗狂鬧，完全不顧對方感受，結果有同事頂不住，煽動其他人過檔，十八人團隊走剩七人。受此慘痛教訓，他深知要收斂脾氣，亦明白到自己管理技巧不足，邊做邊學，慢慢重建廚房的軍心。現時他統領十六人廚隊，與同事們有講有笑，再不是從前的火爆仔。

提起未來路向，他表示會飲水思源，「好多人學滿師都想自己開餐廳，但我就無諗過，因為開餐廳要兼顧好多嘢，唔可以專心一意煮嘢食，我反而想留喺呢度，專心鑽研廚藝。」入行十年，他捱過罵、受過傷、被離棄，但他發現最愛仍是入廚。

關偉聰小檔案

現職：Harlan's Bar and Restaurant副行政總廚

學歷：職業訓練局專業西廚證書