SUN搞作：打橫嚟講：香港醜態日日有

問題天天多，醜聞日日有。

香港特區呢半年來，有問題的醜聞，真係每天暴現，我哋呢棚三流時事評論員日日評都評唔切，嚴格來講，係「鬧」唔切，實在太多太醜陋的人和事矣！

每日講一單，係沒法追得切呢個無王管的時局，所以，我諗到條橋，一次過作「短評」：

工聯會陳婉嫻大嬸早前在立法會內，曾聲嘶力竭的數臭梁振英及其《施政報告》，這日，對《施政報告》作致謝動議表決時，佢以梁振英式語言藝術話：「我唔會投反對或棄權票」！媽的，即「贊成」囉大嬸！講就兇狠，投票就「碌銀」！

梁振英為答謝各方好友支持，批准撥款十八億大元，給全港十八區議會使吓！有錢點使好啦？搞吓形象工程，「美化吓」市容也不錯吧！咁咪整啲「藝術品」（「藝」音「偽」）出嚟擺吓囉！喂！上亞厘畢道未有嘢喎！我建議繼荃灣那隻「肥鵝」雕塑後，不如雕座「熊刺狼」喺度，幾有紀念價值o架！仲有，灣仔警署門口雕隻禿鷹，畀人三鞠躬，也不錯！

新《公司條例》的查冊限制，妨礙新聞自由，原來有份審議及贊成的立法會議員才最PK。呢件身為律師的何俊仁居然其身不正，虛報住址，你知唔知乜嘢叫做「誠信」o架？

本來，仲有好多鬧唔切的醜聞，不過無位寫了！最後，在多樁仆街嘢中，好彩有單叫人開心的，就係仆街貪曾雀屎無得做政協。

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府