政壇：搞搞政：靠外援長勝立會FC奸茅

雖然立法會足球隊保持咗十三場不敗紀錄，但其實發水成分居多，皆因過往幾乎所有入球都係靠甲組外援球員射入。按照立會規定，全隊十一人內只需有六個議員就可用立會名義出戰，所以外援可佔近半數。由於前隊長林大輝做過班霸愉園同流浪班主，加上前領隊譚偉豪身兼傑志會長，所以當時搵甲組球員幫手完全冇難度，所以先會贏足咁多場。

今屆改由建仔陳克勤做晒兩個職位。正當大家以為今屆球隊未必可以重捨昔日光輝時，克勤就透露會搵和富大埔足球隊幫手做外援，仲會搵多位足球猛將幫手，除李健和、山度士、馮嘉奇外，仲有前足球先生丘建威。另外，佢嘅黨友梁志祥亦會喺元朗區搵啲足球猛人幫「腳」。

立會足球隊聽日會舉行今屆首場友誼賽，對手係實力強勁嘅大律師公會。克勤話對手實力有番咁上下，而且仲密密練兵，誓要喺球場贏立會一仗咁話，所以立會隊絕對不容有失。查實睇陣容就知呢場波立會冇得輸，但就令人覺得有啲打茅波嘅感覺囉！