政壇：大舊石護貪曾答謝關照

尋日立法會繼續辯論施政報告致謝動議，唔少建制派議員都鬧爆「貪曾」前特首曾蔭權爵士在任時幾乎樣樣嘢都不思進取，新民黨主席葉劉淑儀就批評貪曾政府處理房屋問題流於保守，好似驚弓之鳥咁事事驚餐飽，驚經濟泡沫爆破會影響樓市，所以就乜都唔做。不過，地產建造界議員「大舊石」石禮謙竟然「掩耳閉目」，力排眾議力撐貪曾。

大舊石暗寸其他議員為咗討好現屆政府，不惜搵啲嘢批評貪曾，之後仲為貪曾護航：「係咪所有曾特首做嘅嘢都係錯嘅呢？你哋今日係咁鬧，之前點解支持致謝動議？」佢之後大讚貪曾任內功績，又寸其他議員批評唔公道，忘記晒貪曾任內貪盡海陸空嘅醜聞，兼夾貪曾依家仲被廉政公署調查添！佢一開聲就撐貪曾，令議員嚇咗一跳。諗深一層佢同貪曾分屬老友，而且當年貪曾死都唔肯起居屋紓緩房屋短缺，對地產界同樓價絕對有利，就知道點解佢直至今日都仲要幫貪曾講好說話啦！