政壇：活字印刷工具歸宿柴灣

早前因為一齣得獎電影，令上環永利街成為保育焦點，當中一間印刷公司嘅古董級印刷工具，經本地藝術家又一山人（黃炳培）穿針引線下，近日就移送到柴灣青年廣場作永久性展覽，期望為數碼時代中成長嘅年輕一輩，了解印刷技術嘅演進從而有所啟發。

又一山人話在場嘅展品都係活字印刷工具，亦係世上最古老嘅印刷技術之一，活字印刷要逐個字粒嚟執，確係「粒粒皆辛苦」，既麻煩又欠效率，所以被淘汰實屬理所當然。

至於今次展品嘅物主、偉志印務公司創辦人李澤裕話，展覽令佢悲喜交集，悲係要告別陪伴佢多年嘅謀生工具；喜係因為呢批印刷工具有個好歸宿。佢話為咗安置呢批年代久遠嘅活字印刷工具，曾聯絡多個政府機構但不得要領，如今能夠於青年廣場永久擺放，令到年輕人知道印刷文化與傳統，實在係最好嘅結局。