少年識盡愁滋味 教育慘業埋禍根

開講有話，青少年係社會未來棟樑，咁究竟香港嘅棟樑夠唔夠堅實呢？唉，青少年源源不絕加入失業大軍，唔好話撐起香港，自己撐唔撐到落去都成問題呀！

港府數字顯示，十五歲至三十四歲嘅失業人士共有五萬一千二百人，當中四成四人擁有專上學歷添，而青少年申領綜援人數雖然稍為減少，但依然有三千八百人，你都咪話唔閉翳。

學電影對白話齋，如果人生有四季，青少時代就係春天，應該朝氣勃勃風光明媚至啱。點知現實世界中，居然有咁多青少年處於苦寒嚴冬，唔止失業，仲要靠綜援度日，前路茫茫，一片暗淡，咁搞法，香港嘅未來又點會光明呢？

青少年自身難保，未來棟樑危危乎，官老爺點回應呢？死撐囉。勞工及福利局局長張建宗係咁講嘅，「可能有失業人士因工作性質或聘用條件不合其要求，而不願意接受某些工作，亦可能因缺乏相關工作技能及經驗，而未能填補某些職位空缺」……為免大家瞓着覺，下刪一百字。

叮，都唔知張建宗究竟想表達乜嘢意思，簡直九唔搭八。唔使耍官腔遮醜嘞，青少年失業率高企，原因其實好簡單，四個字講晒：人力錯配！

所謂有人無工做，有工無人做。無錯，家陣大把青少年搵唔到工做，但同時亦有大量職位空缺搵唔到人填補喎。嗱，金融業缺人，資訊科技業搶人，建造業更加敲鑼打鼓搵人添，又加人工，又增培訓，依然無法緩和行內人力斷層危機，搞到話要輸入外勞添。一邊青少年大量失業，一邊商界要求輸入外勞，搞成咁荒謬嘅局面，何止人力錯配，簡直政策錯晒！

講到尾，人力錯配嘅禍源係人腦錯配。前朝政府被銅臭衝昏頭腦，盲目催谷教育產業，結果副學士泡沫不斷膨脹，黑心學店荷包不斷腫脹，但係莘莘學子就惆悵兼吹脹咯，付出金錢時間精神讀完副學士隨時學無所用，變咗高不成、低不就嘅職場邊緣一族。所以咯喎，失業大軍之中超過四成擁有專上學歷，大家知點解啦，就係前朝政府無做好份工，志大才疏，誤人子弟！

教育慘業假大空，靠害棟樑無陰功。香港缺乏天然資源，過去能夠創造經濟奇迹，全靠擁有高質素嘅人才同勞動力，人力錯配等如自毀長城嘅咋。嗱，如果張建宗等官僚無能力補番呢隻鑊，反映你哋都係人力錯配，小心被失業呀，叮！