次世代生活圈：光影塗鴉

光，只有一剎那，難以留住。近年一班八十後卻愛拿着相機和電筒，在城市裏捕捉光軌，大玩光影塗鴉（Light Painting）。他們游走全港各地，在空氣中寫字、畫畫，再配合相機長時間曝光，拍攝出一幅幅夜光畫，為黑夜城市注入光色彩。

「最初係唔忿氣，無理由人哋做到，我哋香港人做唔到？」去年十月，阿進在網上看到一系列外國光影塗鴉作品，以自己國家的著名景點作背景，再以手電筒、螢光棒等發光裝置，繪畫文字或圖案，然後用相機以慢快門留住光影。那時本港仍未流行這種攝影新玩法，於是阿進成立群組，結集一班攝影愛好者，一同創作光影塗鴉作品。

他與阿琦、阿豪、阿建，一行四人，每半個月便會相約在深夜出動「畫畫」。新政府總部、星光大道、萬宜水庫、南生圍都是他們的取景場地，每幅相中還有一個由光畫出來的彩色球體，阿琦解釋，「呢個只係我哋一個標誌，其實無特別意思。不過我哋每次影完，都會擺上網同人分享，希望透過拍攝呢類相片，畀多啲人認識香港。」

留住光影的玩意近年成為八十後的潮流，阿建坦言全因玩法「夠驚喜」，「寫字或者畫畫嘅時候，係睇唔到啲光，但就出現喺幅相度，每次畫完，都唔知結果係點。」阿豪稱，最大收穫是讓他們更加了解香港，「我哋成日要搵啲漆黑嘅環境影相，先發覺香港光污染好嚴重，期間仲捐窿捐罅，認識咗香港好多地方。」