SUN搞作：打橫嚟講：港人港奶，靠民間自救？

香港政府高層之廢，可由大陸走私狂徒肆意搶奪港人BB生命之奶粉之事，則見一斑。

梁振英口噏責成其班子做嘢、林鄭召開跨部門會議大龍鳳、食衞局高永文話會在「必要時」就出手，好一句「必要時」、警察部禿鷹推說打擊水貨客唔係佢哋嘅核心職務、商經局新一代人肉錄音機「卡片蘇」話會好好研究掃把頭的建議（此婆娘的建議，是抄襲一個時政評論員黃世澤的建議）。

海關高層好嘢呀！佢哋嘅責任，係在關口一（目及）到有水貨客，就即時「報警」！不過，唔係撥輪畀禿鷹，而係話畀內地海關知喎！喂！你哋打邊個工o架？運房局嘅張炳良就更頂癮，佢話負責與港鐵聯絡，唔畀水貨客滋擾民生喎！佢咁就叫做問責局局長呀！

睇到呢班粉皮，逗住高薪咁做嘢，香港唔死就怪啦！

高官廢柴無料到，坊間一批知識分子自發提供意見，包括林忌的「出入口條例」、練乙錚的「徵收奶粉離境關稅」、黃世澤的「儲備商品條例」（此好橋畀掃把頭多謝無句的擸為己用）等等都係民間自救，打擊「非法走奶」的有效方法。何解小市民都懂的，而政府想不出的呢？真跳海！

香港官員只懂叫「偽裝藥房」唔好炒貴及囤積奶粉，你班高薪粉皮知唔知呢啲新開嘅「藥房」，大多是大陸人做老闆的呢？叫佢哋有錢唔搵？同殺佢哋全家有乜分別？

等香港政府救你啲BB，即叫佢哋重新投胎o架啫！點算好？

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府