政壇：政商定格：星展數鈔機識睇錢排序

位於廣東道100號嘅星展豐盛理財中心尋日開幕，新分行仲係星展香港嘅第一間樓上舖。緣何要「上樓」？星展香港豐盛理財及分行網絡業務主管Derek鍾少權就話，皆因尖沙咀嘅地舖租金比樓上舖貴成3、4倍，係「上樓」嘅考慮之一。

至於新舖有乜特別？星展董事總經理兼零售銀行業務總監Pearlyn潘燕明話，新分行嘅設計配合Canton100嘅海景，裝修有飛機艙嘅意味!

唔只室內設計特別，Canton100分行有一樣新玩意，令Derek玩得不亦樂乎。估吓係咩？竟然係一部數鈔機！Derek用一疊8,880元鈔票示範，原來嗰部數鈔機識得將雜亂嘅鈔票按金額排序，佢話部機係星展香港獨有o架，遲啲新分行都會安裝。