政壇：政商定格：項明生南美學探戈過電

Sony Computer Entertainment香港董事James項明生啱啱去咗南極同南美洲旅遊大半個月，今次係佢首次踏足南極，見到成千上萬隻趣致嘅企鵝，又目睹極地冰山壯麗景色，認真不枉此行。

已去過南美洲多次嘅James，今次途經阿根廷欣賞咗兩場精彩嘅探戈（Tango）表演，引起佢一探究竟嘅好奇心，於是臨時加插學舞行程。佢參加當地一間已有逾百年歷史嘅探戈舞學校，探戈嘅舞步好性感，腳要經常喺舞伴胯下捐來捐去，但佢就論盡到成日踩親舞伴隻腳，好尷尬。

跳舞老師仲教路，要同舞伴時刻保持眼神交流，結果佢望多拍檔一陣就有過電嘅感覺，怕醜到耳仔都紅埋。經此一役，佢先知探戈原來係情人之間跳嘅舞！