政壇：搞搞政：新民黨壯大建仔好頭痕

距離下屆區議會選舉尚有近三年時間，但各大政黨陸續展開選舉前期部署工作，其中新民黨可謂最為積極四出搵人洽談加盟合作。有消息指新民黨最近睇中某個有泛民背景嘅區議員，正展開前期游說工作，本來人哋有志於壯大實力實屬無可厚非，最弊係新民黨呢個舉動觸動咗建制派神經，特別係擁有最多區議員嘅建仔。

有建仔資深地區人士形容地區工作就好似「貓捉老鼠」咁，要有老鼠先激發地區拓展工作，所以一旦將泛民連根拔起，佢哋嘅危機意識自然打咗折扣，留番啲老鼠先至有啲動力。

咁即係話佢哋擔心嘅唔係新民黨坐大，而係區議會成為建制天下後，「貓捉老鼠」效應自然失效，有機會令建制派內訌。咁睇怕建仔主席譚耀宗都好頭痕，又要諗計調解嘞！

雖然建制派提出呢番「貓捉老鼠論」，但新民黨一於好少理，該黨副主席田北辰話搵人加入最重要係理念一致，又要睇吓人選對個別課題，好似釋法、全民退休保障等有乜睇法。