政壇：林瑞麟傳替詩姐任高職

雖然前政務司司長「林公公」林瑞麟，現正身處英國進修神學，但喺政圈傳佢捲土重來嘅消息從未停止，最近佢嘅新動向再度炒熱，有傳佢會接替前律政司司長梁愛詩，出任基本法委員會副主任，一切關鍵在於詩姐會否引退喎！

新一屆全國政協委員名單陸續喺親中圈子流傳，焦點之一係多名前高官能否進身全國政協，但曾傳過會出任全國政協甚至政協常委嘅林公公，名字就並冇喺名單之上出現，不過有親中消息指出，中央可能係另有安排，有更重要任務要交付畀本身係大律師嘅佢。

消息指出，林公公接替詩姐當基委會副主任嘅傳聞，早喺舊年年中開始流傳，一來係詩姐年事已高，任期又即將屆滿，二來係林公公出任政制及內地事務局局長多時，屢次披甲上陣推銷政改，對《基本法》十分熟悉，一旦詩姐引退，林公公絕對係合適繼任人選。