政壇：助理過檔差啲整喊哪吒

話說有個跟咗西貢區議員「哪吒」方國珊五年嘅助理，最近突然粒聲唔出走咗去，原來去咗死對頭富貴黨做地區幹事。哪吒話呢位助理手持好多機密資料，包括居民聯絡電話，仲曾經有過佢屋企鎖匙添，但竟然冇一個月通知就突然不辭而別，過檔富貴黨，真係好驚前助理會將資料唔知點用。哪吒尋日開訴苦大會，批評富貴黨用銀彈政策挖角呢招，實在太冇政治道德喎！

哪吒仲話聽聞富貴黨係特登用高薪挖角，然後再掉轉槍頭去參選硬撼佢。雖然佢大數呢位前助理多宗罪，但我哋問過呢名助理，又出現另一版本，原來呢位助理舊年十一月已遞辭職信，但拖拖拉拉到今年一月至正式離開，至於有冇跟足勞工法例走人，佢就話跟足規矩，如果哪吒覺得佢有乜做錯，歡迎去勞工處告佢喎。

曾經五年賓主關係，點解要搞到咁惡劣呢？聽聞係呢位助理不滿哪吒自從立法會選舉落敗後性情大變。不過，呢啲嘢到底誰是誰非，真係好難判斷，但哪吒尋日就講到差啲喊咗出嚟，唔講仲以為佢發生咗乜嘢事。