政壇：泛民評英熊標準亂龍

泛民主派成日批評政府同建制派講嘢前後矛盾、做事持雙重標準，但其實講到雙重標準呢樣嘢，泛民敢認第二，相信全港都冇人敢認第一。最近公文袋同白鴿黨評論廉政公署立案調查特首CY梁振英同全國政協委員劉夢熊，涉嫌喺特首選舉中賄選嘅案件，就一齊大玩雙重標準，言行令人側目。

話說CY日前回應廉署立案調查時，提到近來不斷有人就這件事、那件事向廉署舉報佢，相信廉署會根據事實同法律秉公辦理。

本來呢番話係針對泛民係唔係都走去廉署報案，務求拉CY落台，浪費執法機關嘅時間同資源，但係泛民就將佢曲解為向廉署施壓，本身已非常夾硬。

白鴿總幹事前後矛盾

其中公文袋黨魁「袋巾傑」梁家傑更加向傳媒話：「佢（CY）較明智嘅做法係唔講好過講，因為佢始終係牽涉今次投訴嘅主角。」乜公文袋唔係一直要求CY公開向全港市民詳細交代事件、唔好藉廉署調查做擋箭牌嘅咩？希望立法會稍後表決係咪引用特權法調查劉夢熊事件時，袋巾傑會講得出、做得到，投下反對票以免CY再講更多嘢。

白鴿黨就仲離譜，曾喺廉署做過嘅白鴿黨總幹事林卓廷，早兩日先話根據《陽光時務週刊》嘅專訪內容，「若梁振英是基於劉夢熊幫他助選，而答應委任公職（行政會議成員），或不涉及賄選」。但尋日又有傳媒引述佢話，CY咁嘅講法係「蔑視投訴內容的嚴重性，無視廉署獨立和專業執法工作，對廉署構成壓力」。真係乜都佢講晒。