客似雲來知多少 水貨亂象何時了

開講有話，有利就有弊。旅遊業係香港四大經濟支柱之一，港府咁多年來花費唔少金錢周圍去推介香港，無非都係想吸引多啲旅客啫。好嘞，家陣旅客真係愈來愈多喇，結果又點呢？結果搞到七國咁亂，港人怨聲載道！

旅發局數字顯示，去年訪港旅客人次再創新高，直逼半億大關，達到四千八百六十一萬人次，較前年增加一成六，總消費額達三千零六十五億元，較前年大增百分之十六點五。內地客一枝獨秀，接近三千五百萬人次，佔咗七成一，簡直係客似雲來，旺丁旺財。

本來呢，有朋自遠方來，不亦樂乎，訪港旅客人數屢創新高，帶旺各行各業，有利整體經濟，可以講係一件好事嚟嘅。之不過咁，凡事總有兩面，過猶不及嘅話，好事都會變壞事。呢，旅發局指內地訪客中一半屬即日來回，估計水貨大軍達到一百萬人，都咪話唔得人驚。

即係咁，有需求就有市場，隨住個人遊旅客愈來愈多，有水貨客唔出奇，最弊係水貨問題愈演愈烈，搞到上水一帶秩序大亂事小，中港矛盾不斷惡化事大。今時今日，水貨客乜都要，日用品及奶粉固然唔放過，連朱古力及飲品都搶購，結果推高物價不特止，連港人買罐奶粉都要提供出世紙，再咁落去，香港遲早返番日治時期，乜都要配給。

點樣解決水貨問題？有議員提議取消一簽多行，藉以減少水貨客；亦有議員提出引用《儲備商品條例》，將奶粉列為儲備商品，限制買賣及出口。七嘴八舌，意見多多，可惜全部治標不治本，講咗等於冇講。歸根究柢，同胞爭相來港掃貨，皆因內地假冒偽劣產品氾濫成災，尤其係奶粉，食到嬰兒大頭嘅有之，食到腎結石嘅又有之，係人都怕怕喇，有乜法子唔來香港掃貨吖。

所以話，內地一日唔提高產品質量，唔改善食品安全，水貨問題就冇可能絕迹。講開又講，依家點只香港出現奶粉荒，連歐美等地都難以幸免，有啲國家甚至限制中國人買奶粉添。唔怪得中國人被稱為蝗蟲，雖然係歧視，但唔係完全冇道理o架，周圍瘋狂掃貨，係人都怕咗你喇。

解鈴還須繫鈴人，水貨問題係中國人信心危機引起，而信心危機又係內地貪官及奸商引起，唔掃除呢啲害人蟲，講乜都係假。港府一味打擊水貨客係唔夠嘅，最重要同內地當局加強協調同溝通，進一步完善個人遊政策，須知香港只係彈丸之地，承受力有限，旅客唔一定愈多愈好o架，叮！