SUN搞作：打橫嚟講：好在有老廉，弊在多廢柴

香港廉政公署的宣傳語，曾話過「香港，好在仲有ICAC」，唔知，在日漸大陸化的特區內，佢哋仲可以頂得幾耐？

Anyway，不管暴風雨有多大，雷電有多響，地地道道的真正香港人，一定撐到底的，因我哋已窮得只剩下ICAC了！

面色蒼白的梁振英，掛着兩大黑眼圈，身陷泥濘，仍敢挺老廉，話：「我亦相信廉政公署關於所有人向他們的舉報，都會根據事實來秉公辦理的！」對呀！廉記各位朋友，勿手軟呀！梁先生也開腔支持，咁就請為事實，查個水落石出，捍衞香港（實則是「世界」）的核心價值，打他媽的大壞蛋！

網上廣傳的「意見」，話行會的林奮強「犯了事」，「被調查中」，也無限期的休假，現家陣，廉署就「梁振英與劉夢熊事件」已立案，開了File，梁先生咁力挺老廉徹查，咁是否好應以身作則、身先士卒，亦暫且放假，全力協助ICAC呢？

嗱！如何面對「涉嫌審詢」，精明能幹的梁先生，自有分數，我等小蟻民毋須擔憂，但若果梁振英要坐歪的話，那個名叫陳茂波的，就更加應該立即返屋企早抖啦！

香港特區政府無日安寧，梁振英無法安心做實事，全因為身邊太多此等柴頭累事！大佬！陳茂波局長由未上任，到埋位，至今日，佢有邊日唔係為佢自己身上的醜聞得閒過？

今日認錯後，唔知幾時又衰多一鑊！喂！你仲有乜春嘢未爆出嚟o架？千祈咪再麻煩廉署呀！佢哋好忙！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府