政壇：搞搞政：惡法過骨劉健儀插泛民

立法會前議員劉健儀，話舊年審視公司條例時已發覺唔多妥，但佢唔熟傳媒運作，所以都係從法律角度出發，對禁止查冊一事好有保留，認為咁做不單降低營商透明度，仲難以分清董事嘅法律責任，可惜成個立會冇人同佢有相同觀點，唔止建制派，就連泛民主派如白鴿黨「鐵頭仁」何俊仁、公文袋湯家驊等大狀都話冇問題，商界代表梁君彥更支持通過修例，話公司董事都要有私隱權，所以佢先唔敢再出聲。

劉健儀仲爆料話，最估唔到嘅唔係鐵頭仁同湯家驊，而係有十幾二十年傳媒經驗嘅議員竟都走漏眼，只略略提過話禁止公司查冊會對小股東不利，容許班大股東用掩眼法搞財技都冇人踢爆，從來冇諗過禁止查冊會變相廢傳媒武功，個個都好似蒙住雙眼睇唔到嘢咁，履行唔到監察政府嘅天職。最弊係佢哋依家先至嚟出聲，會唔會太遲呢？