政壇:大輝唐唐談熊眉飛色舞

一場「熊狼鬥」令本來沉寂咗幾個月嘅政壇再起風雲,唐唐「家臣」、廠商會立法會議員林大輝話,自從全國政協委員劉夢熊突然向周刊「爆料」後,佢心情勁靚,有時瞓覺都識笑,仲係笑到甜絲絲嗰種喎。大輝又透露,佢同唐唐通電話時都有傾過呢單嘢,唐唐都係一味笑,總之兩人講起呢個話題就眉飛色舞,完全係隔岸觀火。

大輝尋日同傳媒聚會時,仲話劉夢熊既然爆到咁多料,應該盡快提出證據,否則好容易畀人告誹謗,佢話唐唐對呢個講法都好認同;佢話如果提出唔到證據嘅話,就應該遵守諾言去跳樓,事關呢個指控實在太嚴重喎。大輝亦建議特首梁振英要盡早告劉夢熊,以還自己清白。

外界盛傳劉夢熊投靠CY陣營前,一度向唐營自薦。大輝話劉夢熊選舉前的確有搵佢傾偈,但從來冇話乜嘢拉線。

第一手消息請下載on.cc東方互動iPhone/iPad/Android/Windows Phone Apps