政壇：張炳被諷「冇爐用」

特首梁振英喺施政報告提出多招增加短、中長期土地供應，輿論普遍認為「遠水不能救近火」，新民黨副主席田北辰都睇到政府推出招數嘅局限性，疑似為港人出頭拋出「雪櫃論」，考考運輸及房屋局局長張炳良嘅應對，張炳即時回應話「雪櫃有嘢，但要解凍」，即係話有地但未用得住，田二少立即自問自答形容政府根本冇微波爐，一語道破政府依家增加土地供應嘅困局。

社交網披露晚宴狙擊

樓價只升不跌，港人置業難全城討論多時，田二少尋日喺社交網站爆料話，佢早前出席一個商會晚宴，張炳都有同場出現。田二少話巧婦都要有餸喺手先煮到飯，當時佢以雪櫃作為比喻問及土地供應問題，話依家雪櫃乜餸都冇，問政府點煮飯？張炳腦筋急轉彎話「雪櫃有嘢，但要解凍」，明眼人就意會到即係要再耐心等吓，田二少睇到問題核心直言，你依家話餸在冰格未解凍，但你有微波爐咩？倘若冇嘅咁點食呢？在場人士聽到佢咁問，全場報以大笑。

張炳其後再解畫，話政府仲有招可出穩定樓價，然而田二少再度老實不客氣話，聯繫匯率一日不變，美國經濟仍然偏弱，相信本港樓價易升難跌，所以政府根本技窮，都冇「食材」喎！認真妙問妙答。

眾所周知，煮嘢食最基本步驟係要有晒啲食材，先可以因時制宜開工煮，但依家政府現況係空有土地但唔少仲要轉用途，冇三五七年都難以完成整個程序並有實際供應推出市面，睇怕港人喺政府「解凍」晒啲土地前只可以自求多福，否則要等雪櫃解凍先應對，到時認真喊都無謂。