遊樂場變廢場 懵官僚請離場

極限運動遊樂場變咗浪費無極限，要爭奪最失敗場地設計冠軍，絕對無難度啦！

呢個浪費無極限運動遊樂場位於粉嶺安福街，斥資二千五百萬元興建，係本港少數專為BMX（花式小輪車）玩家而設嘅公眾康樂設施……對唔住，應該係專為有牌玩家而設嘅私人俱樂部至啱。遊樂場開放至今半個月嘞，有資格入場嘅玩家居然只係得兩個咁大把！

香港康樂設施唔多，難得有新場地啟用，居然門堪羅雀，發生乜嘢事呢？嗱，咁就要講番乜嘢係極限運動嘞。極限運動又叫X-Games，係時下青少年潮流玩意，泛指滑板同直排滑輪一類較有危險性嘅運動，而BMX就係其中一種。可能康文署想挑戰難度啦，於是做咗一個相當強人所難嘅動作，就係規定使用場地嘅人士必須先考牌。

係咪好無厘頭呢？揸車就話要考牌啫，如果你係普通人家，會唔會為咗入遊樂場踩單車而花錢花時間去考牌吖？加設考牌門檻等如將小市民摒諸門外。咁搞法，個場點會唔變私人俱樂部？點會唔係日日冷冷清清，悽悽慘慘戚戚吖？

用納稅人咁多錢興建場地，到頭來得小撮人可以享用，一來固然造成浪費，二來亦會造成不公。明明係公眾設施，家陣變咗公眾禁地，點睇都唔對路啦，吓話？

另一個唔對路嘅地方，係遊樂場設計失誤陷阱重重，喺入面玩BMX簡直驚險萬分。本報記者帶資深玩家實地視察，發現設施問題多多，容易造成危險，好似場地中央建有一條斜路，前方居然係一條欄杆，玩家踩住兩個輪風馳電掣衝落嚟，一旦煞掣唔住就會撞到輪飛魄散。所以咯喎，嚴格嚟講遊樂場已經淪為廢場，本港主流玩家唔會嚟呢度搵命博。

唉，浪費公帑真係港產官僚嘅超級強項，不斷推陳出新挑戰極限。好地地一個遊樂場，搞到又落閘趕客，又設計失誤，得物無所用。咁興建嚟做乜呢？不如攞啲錢扶貧好過啦！二千幾萬元可以買好多架單車畀清貧兒童咯。

唔該康文署署長馮程淑儀執番正個場，一來補番隻鑊，防止公帑無極限浪費落去，二來咯喎，防止屬下班懵官僚再做出招惹民怨嘅危險動作。如果有人教而不善，咪請佢哋離場囉，至少都要佢哋考牌合格，先至可以再返嚟，叮！