SUN搞作：打橫嚟講：香港BB無奶食咪好囉！

大陸「水貨客」公然無避忌的大搖大擺，到香港掃貨，還得到有香港身份證的廣東政協力挺，話無大陸人嚟香港「消費」，這裏就實死嘞！呢啲垃圾質素嘅「群眾代表」，存在中華人民共和國裏，是萬分正常的！

鬼咩！連那個主持開會的深圳市長許勤同志，也七到無朋友。當香港特區的BB，因大陸水貨走私客掃光「無毒奶粉」，就快斷糧捱餓時，呢件「冷血」嘅九官（「九品芝麻官」之簡稱）居然不理中港矛盾熾熱爆煲，還當眾揚聲說：「……水貨問題，有利益驅動，（港深兩地）合作過程當中，存在一些矛盾，都是很正常的！」他更言，相信不會成為深港合作障礙，唉！食蕉粉皮也！

大陸官員質素低，因佢哋啲思維以「利益」行先；可恨，香港亦有一名九官，乃保安局局長黎棟國翹住手話「水貨客唔係走私水貨客」、「係好歡迎外來人來港購買」喎！咁！即係唔使做嘢囉！喂！就讓香港啲BB餓死都唔理？

依家，香港不少年輕夫婦唔敢生仔，其原因，除呢度啲教育同環境只會教壞人之外，就係太多政府廢柴，將來生活一定不好過！

若然不將社會問題盡早在源頭就解決，只會產生更多不滿同怨氣，任由香港人內部人民矛盾，轉化為與大陸的敵我矛盾，此實在非中港兩地之福。

或許，香港人唔生仔更正中「一國兩制」的下懷，有若吳克儉所言，大陸的雙非童是香港的生力軍，將來，全港都是雙非「中國人」，咁就成就了「一國」大統。唔使等五十年不變，多有貢獻啊！

大陸官方一直話「一國兩制」是「一國」先行的原則下進行，咁！「香港人」絕晒種咪好囉！食乜奶粉吖！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府