SUN搞作：少膽虫日記：壹代公司

最近狼熊大戰，腥風血雨，少膽虫作為昆蟲界一員，梗係匿埋係《爛果》堆填區避風頭啦，因此荒廢咗《太陽》呢個專欄。想當年，狼未上台，都走嚟拜候淫賤黎，食飯仲叫埋做老腫嘅少膽虫，樂也融融，少膽虫又有餐可黐，仲同夢熊大師有過一面之緣；點知依家大師爆料，搞到個個要上金樓拆掂佢。淫賤黎有見爆料老作界第一被夢熊大師奪去，心中不忿，就嗌少膽虫入房，劈頭就話：「黎家的東西可不能留在你身上了。」

「黎家的東西？」少膽虫呆咗一呆。「我份糧？月尾用晒喇喎！」

淫賤黎搖頭道：「黎家的爆料老作絕技，你唔可以淨係留喺自己度，班記者同創作組員都要進修吓，你去開班授徒啦。」少膽虫當堂怯一怯，因為雖然大家都知少膽虫一向都係爆料先鋒，專爆《爛果》嘅隱事，但係照計淫賤黎唔知o架！

「黎家的東西，我還你了。」少膽虫膽粗粗問：「但係點解要搵少膽虫？」

「不是你還，是我取回來了。」淫賤黎奸笑住咁話：「你做過咩，我真係唔知咩？」少膽虫聽到，咩腳都軟晒。

點知淫賤黎轉過頭，睇住份《爛果》話：「你篇《沙膽熊醜記》，爆料爆得好過隻熊吖！唔搵你搵邊個？」少膽虫抹咗一額汗，即刻陪笑再借尿遁。

講開爆料班，少膽虫順便同讀者分享吓啲內容，主要都係講番夢熊大師嘅爆料絕技。其實少膽虫好少佩服人，今次不得不奉夢熊大師為一代爆料宗師。填詞嘅夕爺話佢從此「只有眼前路，沒有身後身」，少膽虫只係得啖笑，因為少膽虫認識嘅夢熊大師，其實係「有一口氣，爆一單料」，而且只要一心想爆，就「念念不忘，必有爆響」。佢仲同少膽虫講，「爆料」兩個字，一「爆」、一「料」。「爆」出嚟，就當你啱晒；自認無「料」，就點都錯晒。諗番起，喺新聞創作上，真係受益匪淺。