政壇：政商定格：黃家和哈爾濱險變雪條

做咗黑龍江省政協嘅餐飲聯業協會會長Simon黃家和，日前以新丁身份北上哈爾濱開會。當地冰天雪地，氣溫僅得零下三十二度，雖然當地室內有暖氣，着西裝、恤衫開會冇問題，但一行出室外，就係漫天風雪，佢着住羊毛保暖褲、厚鵝毛大衣同超厚頸巾嚟保暖，依然凍到「騰騰震」。

開會之餘，佢趁機參觀當地著名嘅奇幻冰雕，想話除低手套自拍一番，唔使兩分鐘，已凍到手指發痛。佢亦有品嘗地道美食，但選擇以小麥麵食為主，佢話哈爾濱人消費力強，稍後會考慮引入更多港式餐飲，等當地人有啖好食。