政壇：搞搞政：貧窮線爭拗多政府頭痕

我話圓你話方，我話方你話扁。訂立貧窮線都離不開呢個模式，政務司司長林鄭月娥早前話貧窮線會喺今年內訂立，有份討論嘅人意見咁多，目標能否達到，真係好難講。

扶貧委員會社會保障和退休保障專責小組尋日首次開會，討論點樣訂立呢條貧窮線，個會開咗三個鐘頭。小組成員之一嘅新民黨田北辰話外國多數將條貧窮線訂為家庭入息中位數嘅一半，民協KK馮檢基就話要訂喺六成，十足街市買餸討價還價咁。當田二少講到其他國家多數都係訂喺家庭入息中位數五成，KK即刻話貧窮線應該有三條，一條係政府要為喺呢條線下嘅人嘅生活「包底」嘅「絕對貧窮線」，一條就係訂喺家庭入息中位數六成嘅貧窮線，同埋以家庭入息中位數七成計嘅「防貧線」。

據聞，訂貧窮線時係唔係要將資產計算在內，大家都討論咗好耐。一講到入息資產審查，又係個傷腦筋嘅問題。跟住大家又會諗，咁生果金又計唔計入入息呢﹖聽聞呢樣嘢有好大爭議。睇嚟呢樣嘢分分鐘又會掀起社會上一番唇槍舌劍。