政壇：修訂電子化免議員「迷路」

立法會由議員提出議案，大多會有其他議員提出修正案，改嘅可能係幾粒字，大嘅修訂可能成條議案面目全非。議員好多時對於修訂咗乜都唔多清楚，秘書處通常都準備好一個大「劇本」，上面列晒所有修訂嘅版本，費事議員「迷路」，唔知投緊乜嘢票。面對呢個情況，立會上星期三起開始試行電子化。

新系統會自動將原議案同各個修正案合併，仲可以刪去被否決嘅議案，議員喺議事廳內嘅電腦一撳個掣，就可以睇到成個議案改成點，唔使再將原議案同修正案逐粒字對。

例如立會討論建仔EQ葛珮帆提出「幫助中產」嘅無約束力議案，工聯會郭偉強等九位議員就好似掛聖誕樹咁向原議案不斷提出修正案，去到最後，可能EQ都唔認得自己原本嘅議案，電子化後，最少有迹可尋。白鴿黨涂謹申就大讚新系統非常方便，新措施可以慳番研究修正案嘅時間之餘，又可以確保唔會投錯票，可謂一舉兩得。其實電子化都係大趨勢，令到整個程序聰明啲、慳紙啲，但係議員議事嘅質素最重要，唔知電子化能否提高議員嘅議事質素呢？