政壇：陳健波為選民科水翻譯

泛民主派議員經常要求取消所有功能組別，但其實功能組別議員中，又唔係個個都冇作用。好似保險界陳健波咁，直至依家都係功能組別中出席率最高嘅議員，差唔多百分百。除咗開會勤力外，原來佢都好照顧業界選民，自掏腰包幾萬蚊搵人翻譯立法會文件，等班老外知道立會發生乜事。

話說唔少保險公司老闆都係唔識中文嘅外籍人士，健波話一直收到唔少外籍選民投訴，話佢哋唔清楚立法會到底拗緊乜，所以佢近排就外聘專人翻譯立法會文件，一年閒閒哋都要用四、五萬蚊。

其實，每次開完會，立會都有中英文嘅逐字紀錄，但佢話最少要等幾個禮拜，所以寧願自己畀錢，都唔想班選民等。不過由於翻譯嘅文件數量實在太多，佢最近仲請埋個港大畢業生專門負責翻譯添！