政壇：傻強唔知史美倫搞乜

特首CY梁振英由競選期間已話要成立金融發展局，仲喺施政報告出台前親自作預告，但金發局一出台就被外界質疑職能不清。財經事務及庫務局局長「傻強」陳家強尋日去立法會財經事務委員會開會時，再被委員咬住追問金發局職能。雖然佢話政府歡迎金發局工作，但就好似唔知金發局主席史美倫做緊乜，搞到畀委員話佢不負責任。

委員會主席、建仔嘅李慧琼前日就為金發局護航，身兼行會成員嘅佢仲話不論黑貓白貓，捉到老鼠就係好貓，但工聯會王國興唔太同意主席嘅講法，仲話捉老鼠前要先搞清楚自己係乜嘢貓，先知應該想捉乜嘢老鼠。

連工聯會都發聲質疑，班泛民議員梗係打蛇隨棍上，向金發局用擔保公司成立發炮，質疑政府有意繞過立會成立金發局。至於金發局未來會唔會向立會交代？傻強嘅答案亦耐人尋味，佢話史美倫已提出樂意同立會「溝通」，而局方亦樂意向立法會「報告」。唔知溝通同報告之間有無分別嘅呢？

敏感嘢推莊唔答

至於點解籌備工作小組報告研究唔同國家嘅做法，只有一個國家用擔保公司成立，但政府都會用擔保公司成立金發局呢？傻強就話，用擔保公司成立只係小組報告嘅建議，但佢唔係工作小組成員唔可以代答，細節要史美倫答。不過按佢理解，用公司成立只為增加金發局嘅彈性。咁點解一個冇行政、決策嘅高層次諮詢架構要有咁大靈活度呢？佢就話深入研究靈活好啲嘅。

白鴿黨涂謹申就指局方交畀立會嘅文件，寫住金發局「將會」以公司成立，如果議員淨係想叫停用公司成立，應該要向邊個講呢？但傻強講完一輪都冇答應向邊個反映。咁即係仲會唔會聽各方意見o架？唔使緊張，下星期一就邀請史美倫去委員會解畫，至於史「局」長係咪可以說服到一班議員，就要拭目以待。