資助換車遇阻滯 治污隨時又跪低

開講有話，條條大路通羅馬。但點解香港要治理污染，改善空氣質素，條條大路都唔通嘅呢？

呢嗱，當局資助換柴油車計劃又分分鐘跪低嘞。施政報告提出，用一百億元資助業界更換柴油車或者劏車，強制六年內淘汰全港八萬幾部舊款柴油車，希望可以大幅減低路邊空氣污染喎。本來，呢個計劃算係近年最有睇頭嘅治污大計，點知因為津貼額問題，引起業界強烈反彈，計劃能唔能夠順利展開，實在令人懷疑。

為咗爭取提高津貼額，運輸業尋日同環境局副局長陸恭蕙「講數」，業界要求劏車津貼同換車津貼睇齊，由新車車價一成八提升至三成，以及豁免新車首次登記稅兩年，等車主彈性選擇換車時間，唔使畀車商抬價，搞到搵食車被劏完，自己又被人劏到一頸血。

當局點反應呢？暫時嚟講，有反應等於冇反應。佢哋話喎，會同業界繼續開會，談判空間仍然存在，但強調要將劏車津貼提升至三成，難度就相當之大。

咁就死火嘞，業界人士講到明，如果談判破裂，唔排除發動大規模抗爭行動，為咗顯示唔係車大炮，下個月仲可能率先發起一場慢駛遊行添。你知啦，港府施政弱過弱雞，跛過跛腳鴨，萬一運輸業學激進示威者咁佔領中環，咁就冇眼睇咯。

即係咁，舊款柴油車係路邊空氣污染源頭，逐步淘汰係大勢所趨，無可能走回頭路嘅。之不過咁，業界批評資助計劃搵笨，其實亦唔係完全無道理o架，如果資助完仲要業界倒貼幾十萬元，即係攞人隻車啫。家陣搵食艱難，官老爺真係要諗諗計，無謂搞到一拍兩散，兩敗俱傷吖。

唉，空氣污染真係港人噩夢，全個社會都要付出代價，市民吸毒氣固然損害健康，睇嚟運輸業都難免要犧牲少少o架嘞，鬼叫上任特首煲呔曾爵士係「氣候逃犯」咩，佢在任七年翹埋雙手唔做嘢，搞到香港空氣長治久污，藍天白雲愈叫愈走。各位司機大佬，如果你哋真係怨氣難消，遊行標語不妨加多一句：「聲討貪曾七年禍港！」幫其他市民出啖氣都好呀。

一句講晒，資助換車遇阻滯，治污隨時又跪低。空氣污染已經困擾咗港人好多年，唔應該再拖落去，唔該當局着緊啲，盡快同運輸業拆掂佢，千祈咪搞到又要跪低，失禮事小，禍害市民事大呀，叮！