SUN世代：女樓神虛心有好報

八十後莫惠芬，少時最愛玩大富翁儲物業，長大後亦愛投資買樓，更成為女炒樓神。人生如遊戲，沿途抽機會卡，經歷金融地產界的驚濤駭浪，不同的是，她屢遇智者。說到成功秘訣，道理既簡單又老土：「你對人好，人哋對你好，會教你嘢，就要虛心學。」一份虛心，讓莫惠芬屢獲智者至理名言，學處事，學做人。

莫惠芬炒樓戰績彪炳，○九年金融海嘯首次上車，目前已持五個物業，獲利逾千萬元，以她不足三十歲之齡，實在令人驚嘆。說到成功，她總推說自己資質差，更無關家底，成功只因身邊多智者。

時光倒流童年時，莫惠芬是個出身草根、每晚瞓窗台的窮家女，但樂天的性格助她掃平憂慮，學懂惜福：「爹哋係地盤工人，可能喺人哋心目中地位好低，但喺我心中係最高，佢辛苦養大我哋，從無怨言，我幸福指數爆燈！」從慈父身上她學懂不埋怨；他是她首位智者。

窮家女考入大學，○五年畢業踏足社會，莫惠芬視身邊每位都是學習對象。「第一份工係去東莞電子廠工作，老闆係女人，一個人睇三個部門，佢好肯教我。」兩年後轉職家具及裝修公司，她再遇智者：「老闆唔會發脾氣，視所有員工係兄弟，佢話過『你嘅錯都係我嘅錯，你嘅成功係屬於自己！』喺佢身上我學到唔少待人接物方法，上咗重要一課！」這一課，持續兩年多，期間，莫惠芬利用公餘時間學習多種與投資有關的知識，包括證券、地產及保險等，成為投資達人。一○年，她加入財務管理公司，傾盡所知所學，並抱着終身學習的精神，不斷留意各投資者金石良言，或咀嚼成功企業家的故事：「如果有人眼光同我唔同，我一定會特別去聆聽，學習人哋嘅智慧。」

在職場扶搖直上，莫惠芬說竅門除眼光準外，更要用心待人：「前輩教我，對人要將心比己，所以我會了解客人背景，多溝通，先至幫佢投資！」短短兩年，她已由普通的財務諮詢顧問，晉升為聯席總監。

去年，莫惠芬出書教八十後置業致富：「好多八十後因買唔到樓而抗議，我想話畀佢哋知，每個人起跑線都唔同，唔好同人比較，只要比昨日嘅自己進步就得。」大環境中，人很渺小，她卻希望靠人的影響，散發更多正能量。

莫惠芬小檔案

現職：實德財富管理有限公司聯席總監、亞洲青年企業家聯盟副主席

學歷：香港科技大學工業工程及工程管理系學士

興趣：睇樓、投資