政壇：政商定格：黃紹基做三陪開解員工

周大福內地聘請嘅員工兩萬幾人，同好多其他港商一樣，好怕啲員工過完農曆年，就唔肯歸位。周大福董事總經理「基哥」黃紹基講，為咗同員工建立良好關係，佢依家做埋「三陪」──陪員工傾偈、食飯同唱歌！

員工向來都係一間公司嘅重要資產，尤其係服務業更甚，依家內地打工仔咁易「劈炮」。基哥指公司同自己都分別有開網上平台畀同事交流意見，亦有同事直接「上書」同佢吐苦水添！強調「開心工作」嘅基哥話，有好多時自己都會親自開解員工，因此少不免就要陪吓食飯，甚至會去唱歌。以前因為要開內地分店，所以成日同百貨公司老闆食飯，依家陪員工食飯仲多過陪呢啲老闆喎！