政壇：政商定格：陳國民父女下廚高科技

中華廠商聯合會常務會董兼「家電大佬」Edward陳國民因愛下廚，三十年嚟瞓身研究生產各式電器，成功打造億元家電王國。最近佢一口氣買下土瓜灣總部隔籬八個工廈單位，打算將烹飪中心面積擴充一倍至四千呎，仲做埋私房菜添，目的係方便佢同城中好友一邊玩煮飯仔一邊把酒言歡。

早前佢同囡囡陳嘉賢齊齊下廚炮製生炒糯米飯同琵琶雞。只見佢哋依序將切好嘅材料放入自動炒菜機，唔使郁手炒，十二分鐘就完成香噴噴嘅糯米飯。原來炮製琵琶雞仲簡單，將搽上醃料、風乾一晚嘅雞放入光波爐，唔使二十分鐘就變出皮脆肉腍嘅琵琶雞，色香味俱全。不過，咪以為佢哋餐餐都要食好嘢，原來Edward得一個人嘅時候，食碗雲吞麵就搞掂，佢仲希望推廣健康生活態度，深化食得健康嘅理念。