政壇：搞搞政：電視牌照戰蘇錦樑兇人

立法會資訊科技及廣播事務委員會今日邀請咗廣播業界多間公司代表出席，當中包括電視廣播有限公司（無綫）、亞洲電視同有份申請牌照嘅香港電視主席王維基等，相信會議好大機會擦出火花。不過，就喺開會前幾日，商務及經濟發展局局長蘇錦樑突然去信委員會表明立場，首先閂定後門話自己必須遵守行政會議嘅保密原則，即係話如果涉及發牌嘅機密資料就唔會透露。

蘇錦樑又喺信中提醒，有機構正就發牌申請事宜提出司法覆核，任何關於當局現時處理該司法覆核申請嘅細節事宜，佢都唔會評論。唔單止咁，佢仲提醒出席者「在這次會議所作的任何關於該司法覆核案件的意見或評論，我們將不予回應，並保留在日後的司法程序中就該等意見或評論提出爭議的權利」，換句話大家嘅意見將作為日後司法覆核嘅呈堂證供。

咁樣猶如去信「兇」人哋冇分別。莫非佢想曲線叫啲業界咪亂講嘢？試問出席嘅廣播業界代表，仲邊能夠暢所欲言呢？定係每間機構代表都要帶多位律師出席會議呢？