政壇：田少嗌休會去洗手間

立法會尋日下午續會，討論自由黨提出嘅優化失業綜援制度議案，本來個會都開得幾順利，但喺大約三點半鐘嘅時候，當工聯會陳婉嫻鬧爆富貴黨將啲失業人士趕盡殺絕，該黨田北俊突然舉手，當大家以為佢覺得嫻姐嘅說話唔啱聽啦，點知田少話：「主席，我唔知有啲咩規程，我要求休息分零鐘，我要去洗手間！」

主席陰陰笑應承

原來佢唔想因為去咗洗手間而聽唔到公文袋議員嘅發言，又話本來諗過可唔可以要求響鐘數人頭，但又唔知會唔會因佢而流會，所以先硬住頭皮要求主席休會喎。

主席曾鈺成陰陰嘴笑咗幾聲後，竟然批准田少嘅要求，宣布暫停會議十分鐘，但田少又即時舉起兩隻手指，仲彈起身話：「對唔住，主席，我去洗手間，兩分鐘就返嚟！」佢咁講睇怕驚人哋以為佢去小便要十分鐘咁耐，亦估計主席批准休會係因為田少係原動議人，畀佢聽晒咁多人嘅意見。