政壇：李家傑扶貧灼見有知音

政府早前重設嘅扶貧委員會，邀請各界社會人士加入，近日又為轄下多個小組委任增補委員，而恒基地產主席「四叔」李兆基嘅長子李家傑，獲邀加入做扶貧委員會轄下「特別需要社群專責小組」增補委員之一。

李家傑近年致力參與社會事務，不久前透過恒基溫暖工程基金，分別喺天水圍、深水埗同筲箕灣開設咗三間以平價見稱嘅「家園便利店」，點知話咁快就獲垂青加入「特別需要社群專責小組」，相信事前都冇乜人會估到。不過，其實佢喺舊年年底曾表示會主動聯絡政府，提出想加入扶貧委員會，唔知係咪政府見佢咁熱心，所以搵佢加入畀吓意見呢？

至於由政務司司長林鄭月娥親自出任主席嘅「社會保障和退休保障專責小組」，五名增補委員中有至少三人係學術界代表，包括安老事務委員會主席陳章明同香港大學經濟學教授王于漸等。