廉潔只應星洲有 貪腐港澳特別多

千呼萬喚始出來，猶抱琵琶半遮面。隨着內地係威係勢掀起一股反腐風暴，講咗幾十年仍然無影無蹤嘅陽光法案終於有少少聲氣，廣州南沙區準備春節後啟動官員財產申報公示制度，三百幾名副處級以上官員率先「晒身家」。最奇怪嘅係，內地當局聲稱將會借鑑港澳嘅經驗，組團嚟取經喎。

即係咁，遲到好過冇到，內地官僚終於肯公開財產，即使只係做戲都好，總算向前行咗一步，但究竟點解要嚟港澳取經，就真係令人莫名其妙喇。正所謂，唔怕入錯行，最怕拜錯師。內地反腐學港澳，睇怕唔只拜錯師，直情九唔搭八。

冇錯，香港的而且確曾經以廉潔聞名，廉政公署以前唔只打蒼蠅，而且打「大老虎」添，博得唔少掌聲o架。可惜今時唔同往日，自從出咗個「貪遍省港澳、歎盡海陸空」嘅曾蔭權爵士，官商勾結愈演愈烈，廉政一鋪清袋，仲有乜嘢經可以取吖，唔通內地官僚想學貪曾連幾隻雞幾斤菜心都唔放過咩。話時話，廉署唔係聲稱已立案調查貪曾嘅咩，點解查嚟查去都冇下文呢？點解貪曾依家仲可以逍遙法外呢？唔怪得香港廉潔指數國際排名一路下跌喇，其中法治評分仲係全球首五個最自由經濟體中包尾添，真係丟晒架咯！

澳門又點呢？只可以講五十步笑一百步。表面上澳門賭業興旺，財源廣進，年年派錢，確係幾風光嘅，實際上澳門早就淪為貪官嘅洗黑錢中心，烏煙瘴氣，七國咁亂。呢，歐文龍世紀巨貪案愈揭愈臭，包括本港富商劉鑾雄等人亦捲入其中，水洗都唔清。仲有吖，聽講最少五名本港超級富豪亦涉及呢單案，其中有啲同貪曾過從甚密，而最離奇嘅係，本港廉署最先揭發此案，但就交畀澳門當局調查同起訴，貪曾當時仲將已夠鐘退休嘅自己友湯顯明廉政專員任期延長，如果話當中冇蠱惑咯喎，細路仔都唔信喇。

總而言之，講到貪腐，香港同澳門一擔擔嘅咋，內地當局聲稱要嚟港澳取經，擺明係愚弄百姓，侮辱人民智慧。正如有網民質疑，內地官僚取經係假，公費旅遊就真。其實計太一叮話齋，要學不如學新加坡，人哋嘅政府廉潔有效，官員安分守己，社會安定繁榮，咁先至值得取經吖嘛。一句講晒，廉潔只應星洲有，貪腐港澳特別多，唔好摸錯門口吖，叮！