SUN搞作：打橫嚟講：又剷除一障礙威脅

最近，由電視劇流傳出來的一句口頭禪，是為「煩惱日日有嘅！」於樂觀的人而言，反正麻煩是避不掉的，可積極面對，深信「困難總會過去的！」但對悲觀的人來說，就是一種悲慘的痛苦！不過，總好過一啲低能兒，若非把「煩惱」的起因，推諉他人，就係將件事愈搞愈「喎」。

嗱！有關那件運滯嘅「金融發展局」，十幾個月前，早喺梁振英參選特首時嘅大支票《競選政綱》中已有提及，何解，直至今天，呢個局嘅頭領查史美倫主席，仲未知呢檔嘢係乜傢伙？一間「有限公司」吖？定係梁先生話嘅「公共機構」呢？喂！你兩位玩泥沙呀？

畀人追問炳得多，哈哈！查史大嬸才急急召開完第一次大會，商討「定位」，及後走出嚟解畫，話金發局係香港特區財經事務及庫務局轄下係「非法」（佢稍停一秒半，再講）「定機構」，又話係「非私人公司」（係人都知啦！仲使講！），但不尋常的，呢間「非私人公司」卻毋須經立法會同意，已向政府相關部門及財金機構借調四名人手，喂！呢四件係用緊公帑出糧嗰喎！使唔使問下代表我哋市民嘅立法會先呢？嗱！我都有間非私人公司喎！唔該梁先生又派幾件嚟幫手好喎！

呢件事，看到梁先生的口才智慧真勁，氹得查史大嬸落水，一招就讓佢露底，絕非有能力治理香港的plan B熱門人選，哈，既可除掉心腹大患，又可安心多坐一會！

「煩惱」？只有無腦啲人會日日增多啫！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府