政壇：搞搞政：陳啟宗發炮暗批《蘋果》貪曾

向來敢言嘅恒隆集團主席陳啟宗尋日出席商界舉辦嘅施政報告午餐會後又再發炮，不點名批評《蘋果日報》報道指政府有意研究放寬或解除港島薄扶林同半山區嘅發展限制，其實係益咗本身喺薄扶林有土地嘅恒隆集團，佢話政府個個區域都會去研究，佢本身作為地產商，好多地方都可能會擁有土地，「咁啱嗰度我有幅土地，咁就話益咗一個地產商，呢個根本係非常不負責任講法！」

佢更舉一反三話，行政會議成員張震遠曾提過空置稅，報道又話恒隆有嘅單位貨尾比較多，反問呢個係咪政府針對恒隆嘅政策？至於有指近日恒隆才發售囤積單位，佢大力反駁呢個講法係冇做功課，冇研究歷史，重申完全同空置稅無關。

當被多次問及新政府房屋政策成效時，佢暗批貪曾過去七、八年冇賣地係錯誤嘅政策，搞到出現極度歪曲嘅香港房地產市場，出現不正常情況。佢以中藥作為比喻，認為貪曾過去七年遺留下嘅問題需要時間去調理：「你有啲近火，睇得太短視不明智，淨係睇一至兩個月不明智，要睇多三個月、六個月，任何政策都要時間先有成效」，但佢話自己唔係神仙，只係估計隨住供應慢慢增加，樓價會平穩啲（moderate）。