早前寫過終極普選聯盟（普選聯）自覺自己個朵已經臭晒，有意自行摺埋或改番個新名，希望可以吸納之前唔肯入普選聯嘅泛民黨派加盟，一齊討論下一輪政改方案。尋日普選聯召開大會，最後決定進入「休眠期」，即係唔解散亦暫時唔再運作，由將來成立嘅新平台接手有關工作。不過，社民連、人民力量及新民主同盟等激進泛民黨派，均對加入新平台有保留，要不同泛民黨派放下成見同私心一齊傾政改，真係難過登天。