政壇：政協常委戰閩粵幫惡鬥

新一屆全國政協常委嘅名單據聞已初步敲定，不日即將揭盅，消息迅即喺中港政壇流傳，唔少有份「參賽」嘅人最終名落孫山，惹起唔少好友戥佢哋唔抵，一時之間怨聲四起，認真傷和氣。

今次常委空缺唔多，五隻手指數得晒，正所謂僧多粥少。「參賽」者嘅政治行情亦時熱時冷，好似前中華總商會會長蔡冠深，啱啱鳴槍起跑時原本係大熱，但中途一度傳出佢已出局，但係聽聞最終佢都係安全到終點。

人數眾多嘅廣東幫及福建幫就更加惡鬥，而且幾乎由開波鬥到完場。大約半個月前，政壇傳出福建社團僑領楊孫西將卸任，由福建社團聯會主席林樹哲頂上，結果惹來廣東幫不滿，認為政協常委仲有洪祖杭呢位閩籍代表喇，若林樹哲可以上位，點解廣東社團總會主席王國強冇份呢？不過其實政協常委之中，廣東幫更加多啦，好似余國春、戴德豐，除非佢哋退位讓賢，否則難有更多空缺分畀廣東人。

傳聞林樹哲都安全出線，但就有人為資深閩籍人士盧文端抱不平，事關佢做全國政協多年，聯繫鄉情嘅經歷資深過林樹哲，點解張櫈仔唔係畀佢坐呢？所以話，若果政協常委唔取消世襲制，無論結果係點，都會有人嘈。話時話，政協常委中仲未有熟悉台灣嘅代表，若果開多個「職位」，咪可以安撫多啲人囉！傳聞跑出嘅仲有恒基李兆基大仔李家傑、醫管局主席胡定旭及前政務司司長唐英年。