政壇：黃錦星代高永文受靶

食物安全對市民嘅健康好重要，早前就出現有問題食油，搞到市民心慌慌，立法會議員Paul謝偉俊尋日就喺立法會大會，質詢政府有乜嘢政策或措施防止問題食油流入市面，政府就派咗環境局局長KS黃錦星到立會做回應。

唔係環境局範疇

阿Paul話「地溝油」令市民聞油色變，食肆生意受損，問當局有乜嘢對策。主打環保嘅KS被委派回應質詢，佢就攞住食物環境衞生署提供嘅資料照稿讀足九分鐘，但讀到超晒時都滿足唔到議員，仲要話食環署冇證據顯示本港有「地溝油」，同埋不斷話會將意見轉達其他部門。聽到KS嘅回應，阿Paul當堂發火，問政府係咪派錯人到場，搞到原本想發問嘅飲食界議員張宇人都話唔想問，費事難為KS咁話。

老實講，問題食油呢個關乎食物安全嘅問題，理論上應該係食物及衞生局嘅範疇，由局長高永文回應先係對口政策局會好啲嘅，由KS回應梗係唔啱嘴形喇，今次無端端畀班議員鬧爆，真係難為KS代替咗高永文受靶啦。

立法會主席曾鈺成亦話，議員提出公眾健康問題，如果只有食物及衞生局答到就應該由該局派官員出席，否則其他政策局都有責任答問題，暗示政府派錯人。其實今次又唔可以怪晒政府嘅，皆因阿Paul條問題大部分都係問回收廢食油嘅政策同規管，政府可能見到「回收」二字就推咗畀KS囉。