SUN搞作：打橫嚟講：查史大嬸露底記

本欄是最早踢爆梁振英搞「金融發展局」，是自招麻煩的另一個香港災禍，嗱！墨迹稍乾，便驚雷乍現，轟轟不絕，真唔知香港點死！

那份廢到無倫的《施政報告》獻世後，以強人姿態蒲頭的「金融發展局」主席查史美倫大嬸，被記者問及此局招攬大批大陸富二代埋位，會否有「赤化」之嫌，查史大嬸兇巴巴的連聲回應：「富二代？我唔明喎！唔明喎！」

唉！這大嬸受大陸官場習氣薰陶久了，以為咁就係好tough，好有嘢！哈！勿畀大陸佬讚兩句，就當真，以為自己係「朱總理」再生，翻版鐵娘子至得o架？現今，咪露餡囉！笑料一樁！哈哈……哈……

查史大嬸唔蒲面，大家都仲相信香港還有人才，哈哈……這是又一誤會，連碎料也不如啫，不過，都或許跟梁班子親信之邵善波、張志剛、劏房波、吳得掂及林奮強等猛料柴頭同grade嘅！

查史大嬸唔背熟書，就撲咗出嚟亂噏，壞了梁振英先生的經濟治港大計，真敗筆累事，查史話「金發局」係「民間機構」、「有限公司」，而梁先生則說係「公共機構」；大嬸又自爆為要嗱臨成事，是方便請人，搞到梁先生被質疑是立心繞過立法會，同用人唯親，並涉嫌關照大陸資本家，又或想搶奪香港財經主導權，總之，被人感覺金發局的權責、範圍、功能和動機都係唔清唔楚，臭屎一堆，唔知點處理。唉！又一災難套落香港人頭上。

又話成熟一項推一項嘅！今劑，又見謊言廢話，真跳海！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府