政壇：政商定格：遇換肝聖手阿姐變粉絲

香港肝壽基金日前舉行二十周年慈善籌款晚宴，宴會設喺香港醫學專科學院，筵開二十幾圍，肝壽基金籌款委員會主席余錦基，上台同歌手合唱英文歌之後再添食中文金曲，八和會館主席汪明荃任嘉賓，佢請纓上台唱歌，輕鬆唱三首歌就籌得十萬元。

不過，阿姐遇上「換肝聖手」兼香港大學外科學系主任盧寵茂，就好似變身粉絲咁，捉住對方自拍合照，而食物及衞生局局長高永文上台時，汪阿姐又舉機拍照。出席者仲有骨科名醫郭有仁及太太郭許雪禮、晚宴籌委會副主席羅詠逑等。

肝癌已成為香港第三號癌症殺手，但本港肯捐肝嘅人仍然唔多，呢一晚高永文帶頭拿出器官捐贈卡，呼籲大家捐肝救人，佢已袋住呢張卡足足二十幾年，唔講唔知，第一張器官捐贈卡係由佢設計。