政壇：政商定格：郭台銘接班人選露端倪

鴻海董事長郭台銘身為全球最大電子代工企業揸弗人，好多人關心佢嘅接班人選，雖然佢曾經講過要等依家得幾歲大嘅細女結婚先會退休，但近排郭台銘嘅大仔郭守正突然以鴻海資訊園區三創數位科技董事長嘅身份，出席鴻海嘅公開活動，郭守正話「唔敢諗」接班嘅事，現階段先把三創做好，但外間仍將今次台北資訊園區嘅項目視為測試佢接班嘅試金石。

一向鍾情電影藝術同美學嘅郭守正同爸爸郭台銘嘅商場勇悍性格好唔同，更一早講明自己對電子代工業毫無興趣，唔會返去鴻海接班，幾年前更加自立門戶，創立咗「山水公司」拍電影、投資「風賦公司」拍電視劇。

佢公司嘅出品包括大家都熟悉嘅《葉問2》，估唔到依家都疊埋心水搞資訊園區項目。