政壇：搞搞政：致謝動議變質政府棄拉票

新一份施政報告發表後，立法會下周三會一連三日辯論致謝動議，據聞政府最近都評估過社會各界對施政報告嘅意見，相信建制同泛民難免角力一番，特首梁振英（CY）過去半年喺大宅僭建問題上被人窮追猛打，施政報告又冇為佢加太多分數，政府要爭取泛民支持根本係癡人說夢，所以CY團隊似乎有意喺拉票時「放軟手腳」，免得浪費政治能量。

據分析，客觀現實係施政報告致謝動議根本無望通過，按照傳統，由立法會內務委員會主席提出嘅致謝動議須經過分組點票，當泛民議員投下反對或棄權票，動議便會遭否決。其次係今年議員數目增至七十人，CY喺泛民群起反對下，獲得史上最多嘅二十七票反對幾乎無可避免。

另有親中人士形容，致謝動議近年已經有所變質，好似變成泛民掛「聖誕樹」嘅表態舞台，反而財政預算案就緊要啲，涉及政府開支，所以政府與其為施政報告同議員討價還價，不如留番啲彈藥等預算案時「箍票」，以免出現撥款不獲通過嘅憲制危機好過。