政壇：楊孫西認老辭政協常委

新一屆香港區全國政協委員名單聽聞最快會喺本月底公布，十多名港區全國政協常委名單亦即將敲定，本身係政協常委嘅福建幫頭領楊孫西自爆因為年齡關係，下屆會辭任政協常委，成為近日首個自認會退落嚟嘅政界資深人士。楊孫西自○三年第十屆全國政協已開始擔任常委，至今做咗十年，佢突然表明心迹「退伍」，唔知對部分心情仍然「十五十六」嘅政界中人會唔會有啲啟示作用呢？

之前已確定嘅港區政協常委空缺有四個，包括因參選特首辭職嘅特首梁振英、因「新地案」被廉政公署起訴嘅前政務司司長許仕仁、前中聯辦副主任黎桂康以及年前逝世嘅商人徐展堂，加埋現年七十四歲嘅民建聯監委會主席楊孫西個位置。據聞楊孫西個空缺，有機會由福建社團聯會主席林樹哲或全國政協、本身同楊孫西好老友嘅盧文端頂上，兩人中又以前者機會被看高一線。