政壇：蔣麗芸長毛立會嗌大交

入咗議會冇耐已因言論出位受關注嘅立法會議員蔣麗芸，繼早前為特首梁振英大宅僭建護航後，尋日又再撲出嚟為保護市區重建局主席張震遠，不惜同社民連「長毛」梁國雄互片，喺立法會發展事務委員會會議上對罵足足三分鐘。

長毛先講CY大宅僭建，又提到張震遠係CY身邊嘅大紅人，但佢嘅商品交易所冇交易，分分鐘執笠，一個生意失敗嘅人……蔣麗芸呢時忽然發難，指斥長毛離題，叫委員會主席劉皇發令長毛收聲。長毛即時連珠爆發回敬：「張震遠係你邊位？關你咩事？你係咪傻o架？傻嘅就睇醫生！呢度係蔣家咩？你叫主席做嘢？你返蔣家搵個妹仔畀你管，斟茶遞水，遞埋拖鞋，喺度發大小姐雌威？發神經！」

講嘢聲線似阿媽教仔嘅蔣麗芸還拖，話長毛廢話，縱使發叔勸交都冇用，地產建造界石禮謙更喺兩人對罵尾聲之際抽水：「如果佢哋鍾意嗌交，可唔可以出去嗌？」