政壇：高官撲樓火得把口

本港樓市熱爆，啱啱截止嘅綠悠雅苑項目同五千個白表免補地價買居屋計劃雙雙錄得超高額認購，市場更有破紀錄嘅高價成交，無殼蝸牛心驚之下更急於買樓，造成搶樓、抬高價格嘅惡性循環。偏偏啱啱發表嘅施政報告只宣布咗一連串中長期計劃，政府高官連日來只有「得把口」撲火。好似財政司司長曾俊華尋日就靠嚇，話有需要時政府會推出措施。房屋及運輸局局長張炳良又叮囑市民小心風險，佢哋冇招可出，惟有以口水撲樓市大火，可惜呢啲行動只會令市民更勞氣！

一味靠嚇市民難收貨

鬍鬚曾尋日出席一個活動時都講到本地樓市熾熱，及近日成交再度飆升，佢數番政府舊年因應美國量化寬鬆推出咗兩項印花稅嘅措施，話會密切注視措施嘅成效，講到近日樓市交投又再熱爆，佢重申有需要時政府會推出適當措施，確保樓市平穩發展。

佢跟住又提醒有意置業人士，市場上依家有啲論點認為，美國可能早於二○一五年加息，一旦美國加息，一定會影響本港嘅樓價，因為供樓人士嘅負擔會大咗。用息口上升嚟靠嚇，鬍鬚曾過去講咗唔係一次半次，總之都係得把口。

另一個靠出口術嘅就係張炳良，佢日前先講過恐慌性買樓，尋日又喺個電台節目話，物業市場有起有落，外國量化寬鬆終會完結，一兩年後息口會上升，市民置業時應該諗得遠啲……跟住大講未來有幾多物業落成。

佢哋不約而同出口術，其實都係對眼前嘅樓市大火冇符，惟有猛噴口水，顯示佢哋有做嘢，呢啲貨，市民會收就怪喇！