官僚防污遲鈍 郵輪廢氣蹂躪

有無人入伙之後至裝大門嘅呢？大家可能會話，梗係無啦，傻嘅咩，間屋咪變無掩雞籠畀賊匪自出自入？嗱，真係有人咁無腦o架，呢個就係香港政府。

嗱嗱嗱，大家放心，新政府總部雖然一度真係變咗無掩雞籠嘅賊仔樂園，但仲未至於「門常開」變「門未裝」咁離譜，太一叮其實係講緊啟德郵輪碼頭。環保團體踢爆，郵輪碼頭將於今年六月入伙啟用，防污染措施居然空空如也，中門大開任由船舶廢氣長驅直入危害市民健康，你話港產官僚係咪遲鈍吖！

本來呢場污染危機係完全可以避免嘅。辦法好簡單o架咋，立法規定郵輪使用潔淨燃油囉，碼頭裝置岸電設施囉，畀泊岸郵輪「停船熄匙」，唔使化身大墨魚不停噴黑煙。但大家估吓呢兩項防污工程進展成點？簡直慢過龜爬。立法草案拖到最快都要明年至提交立法會，岸電設施更加剛剛至喺施政報告提出，至今未有落實時間表。

你話港府幾反智吖，一方面施政報告宣布投放一百億元利誘柴油車減排，一方面任由郵輪輸入廢氣，咁咪即係將公帑倒入鹹水海？岸電設施被列入施政報告，即係有必要啦，點解一早唔做呢？船舶燃油要立法規管，即係好緊要啦，點解又拖得就拖呢？叮佢個鎯鎯，官老爺做嘢烏厘單刀，香港有乜可能唔烏煙瘴氣呀？

郵輪廢氣洶湧拍岸，公帑倒入鹹水海都其次，最驚係市民命仔凍過水咋。嗱，睇兩個數字就嚇死你：郵輪廢氣含硫量比柴油車高出二千八百倍！十五艘巨無霸郵輪排出嘅二氧化硫等同七億六千萬架汽車！咁搞法，啟德鄰近居民咪直接間接餐餐廢氣送飯？本港平均每年有七千人死於空氣污染，唔該官老爺未搞掂骨灰龕位嚴重短缺問題前咪再害人嘞！

唉，凡事有利就有弊，超級郵輪唔止帶來「散財」嘅大款遊客，亦會帶來「撒毒」嘅黑煙廢氣，呢個係常識。官老爺只要似番個正常人，及早防範，問題自然減到最少，甚至達到「煙消財散人安樂」嘅雙贏局面。點知依家郵輪碼頭隨時變蹂躪市民，碼頭押後啟用唔係，防污措施加快唔得，正式兩頭唔到岸。

有人話，郵輪碼頭犯咗風水大忌，形成靈蛇吐吞有口難張敗象，估唔到家陣仲大鑊，分分鐘陷入毒蛇吐霧有招難防困局。港府要改運，睇嚟唔只要「救蛇」，仲要打蛇，打晒啲官場大懶蛇，叮！