SUN搞作：打橫嚟講：打天打瓦，布鬼見

東莞話裏，有一土語口頭禪，是為：「打天打瓦」，意指「亂噏無為」、「吹水」或「多鬼餘」。

有人廢噏，話今年香港房屋「產量目標」未達至市民「置業階梯」時，就會喺「適當時機」、「考慮研究」、「作進一步」、「加大力度」、「回應大眾」（上述所有括號，全是香港今屆特區最高層的語言藝術精華，抽走括號，全句唔知佢噏乜春），若聽完呢類狗噏廢話，直斥此乃謊言講大話，東莞人便會鄙視的說：「打天打瓦」。

無端端，做乜鬼我喺度露一手，演示我的東莞話學問呢？噢！因無綫電視新劇《老表，你好嘢！》內，小藝員王祖藍扮演一個大陸來港，滿口鄉音的東莞仔之遭遇，帶出中港文化的矛盾，謔笑近期在香港特區發生的反智「真人真事」。本來，果真改編得好正斗，兼且好好笑，是近年電視處境喜劇的鮮有佳作，哈！咁都收到近百宗投訴，話「抹黑中港兩地人」喎！

如果，呢啲投訴，來自「真心膠」的不滿，咁！證明此地啲人怨氣太多太深，除無幽默感外，更缺乏理性包容，和患有小農憤青症候群病態，佢哋唔係要下下舉報，而係要食飽藥至好出街。如果，呢啲投訴，唔係「真心」不滿，而係有組織的，有人策動「造假」的，那就是可恥。曾有經理人公司出錢請五毛黨在網上攻擊旗下藝員的對手，唱臭對方；當然，亦有人請五毛黨狂讚自己！不管正反，一樣卑鄙下流。

東莞話裏還有一口頭禪，係「布鬼見」，意謂「不稀罕」、「送都唔要」也，例如今屆嘅《施政報告》，就真係「布鬼見」、「打天打瓦」嘞！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府