政壇：搞搞政：張志剛過紅難入教資會

早前有報道指政府有意委任行會成員張志剛，出任大學教育資助委員會（教資會）委員，但遭到高等教育界同教育局反對，除因佢本身係「超級梁粉」外，另一原因係佢曾多次發言或撰文，批評部分大學嘅民調方法同反政府學者嘅言論。

行會成員史美倫早前卸任教資會主席後，政府都想搵番個行會成員入去，但搵邊個好呢？知情人士話，李國章做過中大校長、羅范椒芬做教育統籌局常秘時得罪過唔少大學、「公職王」陳智思身兼嶺南大學校董會主席、「三料議員」李慧琼係科技大學校董、積金局主席胡紅玉等人亦另有重要公職，所以都唔係合適人選，而捲入賣樓風波嘅林奮強，至今仍無限期休假中。喺唔夠人用嘅情況下，惟有明知具爭議性都推薦張志剛。

知情人士抱怨，泛民同部分高教界人士質疑張志剛背景過紅，明顯係持雙重標準兼選擇性失憶，事關史美倫身兼港區全國人大代表，又做過中國證監會副主席，之前又冇人話佢紅。其實自國教風波後，整個教育界都變得極為政治化，早前考評局主席陳仲尼被迫棄選人大就係一例。政府會否唔理反對意見，硬推張志剛入教資會，一日未公布都仲有變數。